زوجي لا يصرف على البيت رغم أنه يشتغل.. ما هو الحل الشرعي والقانوني

 

راجلي ما كيصرفش على الدار رغم أنو خدام اش ندير؟

راجلي ما كيصرفش على الدار رغم أنو خدام اش ندير؟ رسالة وصلتني من أخت كتقول راجلي خدام والخلصة ديالو مزيانة ولكن مصروف الدار أنا اللي كنهزو ملي كنطلبو كيقول ليا ما عنديش. هاد المشكل ولى كثير فديورنا والزوجة كتحتار بين السكوت والصبر وبين المواجهة.

أولا خاصنا نفرقو بين نوعين ديال الرجال، راجل ما عندوش الفلوس بصح وراجل عندو الفلوس ولكنه بخيل أو كيصرف فلوسو فبلاصة أخرى. اللول معذور وكيحتاج المساعدة والثاني كيحتاج الحكمة والحزم.

شنو هو حكم الشرع فمصروف الزوجة؟

الشرع واضح، نفقة الزوجة والولاد واجبة على الزوج حتى إلا كانت الزوجة غنية وخدامة. قال الله تعالى لينفق ذو سعة من سعته. النفقة كتشمل الماكلة والشراب واللباس والسكن والدواء. الزوجة ماشي مجبرة تصرف من مالها على الدار وإلا صرفات فهادا كرم منها ماشي واجب عليها ولها أجر الصدقة.

علاش بعض الأزواج ما كيصرفوش؟

البخل كطبع، تربى على البخل وكيشوف أن كل درهم كيصرفو خسارة.

الدين أو التزامات خفية، عليه كريدي أو كيعاون أهلو فالخفاء وكيحشم يقول.

عدم الشعور بالمسؤولية، حيث لقا مراتو كتصرف وكتسد الفراغ فاعتمد عليها.

العقاب، بعض الأزواج كيعاقب مراتو بالمصروف ملي كتغضب أو كتمشي لدار أهلها.

خمس خطوات ذكية كتخليه يصرف بلا عراك

الخطوة الأولى حلي موضوع المصروف بهدوء ماشي وقت الغضب

ما تطلبيش الفلوس وهو داخل من الخدمة عيان ولا قدام الدراري. ختاري وقت راحة وقولي بغيت نتافقو على مصروف الدار باش ما نتخاصموش كل مرة. كلمة نتافقو حسن من كلمة عطيني.

الخطوة الثانية ديري ميزانية مكتوبة قدامو

جيبي ورقة وكتبي كرا ضو ما خضرة مدرسة وجمعي المبلغ وقولي هادا ما كنحتاجو فالشهر. الراجل ملي كيشوف الأرقام مكتوبة كيفهم كثر من الهضرة الشفوية. بزاف ديال الرجال ما كيعرفش شحال كتستهلك الدار بصح.

الخطوة الثالثة ما تقارنيهش بغيره أبدا

ما تقوليش راجل صاحبتي كيشري ليها هاد الجملة كتقتل الرجولة عندو وكيعاند كثر. قولي أنا عارفة أنك راجل كريم وباغي يكون بيتك أحسن بيت.

الخطوة الرابعة احتافظي بحقك بطريقة ذكية

إلا كنتي خدامة وكتصرفي ما تعطيهش الخلصة كاملة ديالك. قولي أنا غادي نعاون بمبلغ كذا فقط للكرا مثلا والباقي عليك انت. هكا كيتعلم المسؤولية. وإلا عطاك مصروف قليل ما تقوليش هادا ما كيكفيش بالغضب بل قولي الله يجازيك بخير هادا غادي يكفي لكذا وكذا وبقا كذا وكذا خاصنا نكملوه.

الخطوة الخامسة إلا رفض تماما شنو هو الحل القانوني؟

فالقانون المغربي من حق الزوجة ترفع دعوى النفقة فالمحكمة بلا طلاق. القاضي غادي يحكم ليها بنفقة شهرية حسب الدخل ديال الزوج. هادي خطوة أخيرة من بعد ما كنساليو الحلول الودية ومن بعد تدخل حكماء العائلة. ما تهدديهش بالمحكمة فأول مرة بل خليها كحل أخير.

رسالة لكل زوج كيقرا هادا

أخي القوامة ماشي بالصوت العالي القوامة بالإنفاق. ملي كتصرف على بيتك وولادك انت ما كتمنش على مراتك انت كتدير الواجب ديالك والله غادي يخلف عليك أضعافا. البخيل على أهلو ممقوت حتى من ولادو ملي كيكبرو.

الخلاصة

ما تسكتيش حتى كتتراكم الديون عليك وما تفضحيهش قدام الناس. واجهي المشكل بحكمة بورقة وقلم وبهدوء فإن لم ينفع فتدخل العقلاء وآخر الدواء الكي وهو المحكمة ولكن للحفاظ على البيت وليس لهدمه.